2Ti 2 | MEU | STEP | Taunabunai, natugu e, Keriso Iesu ena harihari-bada lalonai ba goada.

2 Timothy 2

Ba goada

1 Taunabunai, natugu e, Keriso Iesu ena harihari-bada lalonai ba goada. 2 Dibadia taudia hutuma vairadiai vada na hamaorolaimu herevadia na kamonai taudia ba hamaorolaidia; bena idia ese haida ma bae hadibadia. 3 Hisihisi lalodiai ba haheauka, Keriso Iesu ena tuari tauna namona na heto. 4 Tuari tauna ese ina mauri ḡaudia basine haturialai; unu amo tuari oreana lalonai e abia vareai tauna baine hamoalea. 5 Tau ta danu gadara gabuna ai baine goada helulu, a gadara taravatuna basine badinaia, ia ese kwalimu toana basine abia. 6 Biru tauna ena hekwarahi davana be uma anina baine abi guna. 7 Egu hereva anidia ba haero; badina be Lohiabada ese ḡau iboudiai lalodiai aonega baine henimu.

8 Iesu Keriso ba laloa tao: ia na David garana; ia danu mase amo e tore isi. Egu sivarai namo bunai; 9 bona ia dainai hisi na animu egu iḡui ai, kara dika tauna na heto; ḡau tamona, Dirava ena hereva asie ḡuia. 10 Badina binai hisihisi iboudiai na haheaukalaimu, vada e abidia hidi taudia daidiai, Keriso Iesu ena hahemauri bona mia-hanaihanai hairaina bae abi helaoreana.

11 Ina hereva be momokani: ia ida tama mase, ia ida danu tama mauri; 12 baita haheauka, ia ida lohia ai baitala; a baita ḡorea, ia ese baine ḡoreda. 13 Ena be ita ese basita badinaia, to ia ese ita baine badinada, nega iboudiai; badina be sibona basine heḡore.

14 Ini ḡau na ba hahelalolaidia; bona Lohiabada vairanai danu ma ba sisiba henidia, hereva idau-idau basie hepapahuahulaidia, badina be una na asi anina, bona unu amo ikamonaina taudia lalodia bae hadai kerere. 15 Ba goada; Dirava vairanai namomu baine hedinarai, ḡaukara taumu asi emu hemarai, hereva momokani igwaurai-ḡoevana taumu ai baola. 16 A hereva dikadia bona kavakava herevadia amo ba raka oho, badina be idia ese dika bae habadaia. 17 Hereva unuhetomadia na e kara toto dikana e ara moru ara morumu na heto. Humenaio bona Fileto na unuheto; 18 raruosi ese hereva momokani vada e reaia, e tomu tore-isi-lou vada e ore vaitani, bena haida edia kamonai vada e uhea hebubu. 19 Ḡau tamona, Dirava ena badi aukana vada e ginimu; toana bini, Lohiabada na ena taunimanima iboudiai vada dibana, bona, Lohiabada ladana e hatoamu taudia iboudiai ese kara dika bae heautania.

20 Ruma badana lalonai kebere na dia gold bona silver ḡaudia mo, a au bona raro keberedia danu mimia; unu be e matauraimu, a ini be asie matauraimu. 21 Tau ta na hari ḡau dikadia amo sibona baine haheḡoeva, ia na e matauraiamu keberena ai bainela, baine helaḡa, biaguna isiaina ilaohenina baine heḡereḡere, ḡaukara namodia iboudiai ikaradia ai baine heḡereḡere.

22 Uhau edia lebulebu karadia ba heautani. Ini na ba ḡava: kara maoromaoro, abidadama, lalokau, maino. Lalodia ḡoevadia ai Lohiabada ladana e hahaneamu taudia ida ba hebamo heheni. 23 Henanadai kavakavadia bona mata-lahuidia ihedorilaidia ba dadarai; dibamu idia ese heai e havaramu. 24 Lohiabada ena hesiai tauna na basine heai, a taunimanima iboudiai baine gado namo henidia, baine hahediba ḡoevaḡoeva, baine haheauka. 25 E gwaua tubumu taudia baine sisiba henidia mai manauna ida; readia Dirava ese baine hahelalodia kerehai, bena hereva momokani bae diba. 26 Bena, ena be diabolo ese vada e abidia mauri ena ura ikarana, to bae noga, ena idoa amo bae roho mauri.